O Comité en Defensa do Monte Galego convoca a todos os cidadáns e cidadás de Galiza á unha manifestación nacional que terá lugar o vindeiro sábado 1 de outubro na cidade de Ourense ás 20:00 h para reclamar unha nova política forestal de prevención e loita contra os incendios que están a arrasar o monte galego. A saída terá lugar dende o Pavillón dos Remedios para rematar na Praza Maior, onde se dará lectura ao manifesto elaborado polo escritor Xosé Carlos Caneiro.

Baixo o lema LUME NUNCA MÁIS. O NOSO MONTE IMPORTA, os diferentes colectivos que conforman este comité fai unha chamada ás institucións e á sociedade civil galega para que tomen conciencia das medidas urxentes que o comité reclama no documento de BASES EN DEFENSA DO MONTE GALEGO

*** Informe sobre superficie queimada polos lumes (05-10-04)

O Comité de Defensa do Monte Galego creouse en Ourense no 2002 e a nivel galego no verán de 2003 para coordenar os esforzos de diversas organizacións ecoloxistas, sindicais, de propietarios de montes, etc, a favor dunha nova política agroforestal e de loita contra os lumes. A posición do Comité está definida de forma sintética no seu Documento de bases.

Dende 1988 até hoxe en Galicia, segundo datos oficiais, téñense producido máis de 100.000 incendios forestais, que queimaron máis de 500.000 Has. de monte, das que preto de 200.000 Has. eran arboradas. Desde 1995, hai uns 10.000 incendios ao ano, un incendio por cada 2 Km2 de superficie forestal (a media estatal é dun incendio por cada 25 Km2). En Galicia, co 7,7 % da superficie forestal española, acontecen o 45% de todos os incendios e está un 30% da superficie forestal afectada. A metade do número de incendios e da superficie queimada da nosa terra adoitan concentrarse na provincia de Ourense.

O monte é un sector estratéxico para o desenvolvemento sutentábel de Galicia. Os incendios causan graves prexuízos ecolóxicos, sociais e económicos. Seguen a ser un dos principais problemas da nosa terra. Son  a marea negra dos montes.

Non é posíbel avanzarmos na solución deste problema que nos atinxe a todos e todas sen información, educación ambiental e participación social. Por iso, o Comité demanda a creación dun Consello Forestal Galego para atinxir un amplo consenso social sobre a política agroforestal e de loita contra os lumes. O complexo e difícil problema dos incendios non pode ser reducido de xeito simplista a un problema de delincuencia ambiental, sen nada a ver coa orientación da política agroforestal,  nin tampouco ser obxecto dun tratamento electoralista e partidista, como ten feito até hoxe o goberno presidido por Manuel Fraga.

É posíbel e necesaria outra política agroforestal para o país. Todos e todas debemos esixila. Os incendios non son unha praga irremediábel.

  

NUNCA MÁIS INCENDIOS FORESTAIS!

 

 

Esta web foi creada pola Asociación para a Defensa Ecolóxica de Galiza (ADEGA) para o Comité de Defensa do Monte Galego